කොවිඩ් -19 වෛරසයේ ඩෙල්ටා ප්‍රභේදය ඉදිරියේ දී මෙරට තුළ සුලභ වශයෙන් පැතිරයාමේ අවදානමක් මතුව ඇති බව රජය පවසයි.
රාජ්‍ය අමාත්‍ය මහාචාර්ය චන්න ජයසුමන මහතා පවසන්නේ ලෝකයේ බොහෝ රටවල විවිධ කොවිඩ් ප්‍රභේද මේ වන විට පැතිරෙමින් පවතින අතර මෙරට තුළ ද ඩෙල්ටා ප්‍රභේදය පැතිරයාමේ අවදානමක් මතුව ඇති බවය.
අමාත්‍යවරයාගේ අදහස් ,
ලෝකයේ රටවල් බොහොමයකද සීග්‍රයෙන් පැතිර යන ඩෙල්ටාවෙන් ලංකාවට විතරක් ගැලවෙන්න පුළුවන් වේ යැයි තමන් නොසිතන බව පවසන අමාත්‍යවරයා වැඩි දුරටත් පවසන්නේ මේ නිසා මේ ගැන අවධානයෙන් පසුවන බවය.
මුළු ලොව පුරා ම ඩෙල්ටා ප්‍රභේදය ප්‍රමුඛ ප්‍රභේදය බවට පත්වෙමින් තිබෙනවා. මම හිතන්නේ නෑ ශ්‍රී ලංකාවට විතරක් එයින් ගැළවෙන්න පුළුවන්කමක් ලැබෙයි කියලා. ඒ නිසා අපි බලාපොරොත්තු වෙන්න ඕනේ ඉදිරියේ දී ඩෙල්ටා ප්‍රභේදය අපේ රට තුළ සුලභ වශයෙන් පැතිර යයි කියලා. හැබැයි අපි දැනට ලබාදෙන සයිනොෆාම්, අස්ට්‍රාසෙනිකා, මොඩර්නා සහ ෆයිසර් කියන එන්නත් සියල්ලේම වගේම ස්පුට්නික් එන්නතෙන් ඩෙල්ටා ප්‍රභේදය සඳහා විශේෂ ආවරණයක් තියෙනවා කියන කාරණය තමයි විද්‍යාඥයින් පෙන්වා දීලා තියෙන්නේ. එන්නත් ලබාගත් අයට ඩෙල්ටා ප්‍රභේදය වැලඳුනත්, ඉන් ආසාදනයක් ඇති වුණත් ඉන් ඇතිවෙන්නේ අවම බලපෑමක්. ඒ නිසා එන්නත්කරණය ඉතාම වැදගත් වෙනවා. ඒ වගේම අපි දන්නවා දකුණු අමෙරිකාවේ පේරු රට කේන්ද්‍ර කරගෙන ඇති වු ලැම්ඩා කියන ප්‍රභේදය රටවල් ගණනාවක පැතිරෙමින් පවතිනවා. ඒ වගේම අමෙරිකා එක්සත් ජනපදයේ කැලිෆෝනියා ප්‍රාන්තයේ පටන් ගත්ත එප්ස්සයිලන් නමින් හඳුන්වන තවත් අලුත් ප්‍රභේදයකුත් මේ වන විට රටවල් ගණනාවක පැතිරෙමින් පවතිනවා. මේ සියල්ල ගැන අපි අවධානයෙන් පසුවෙනවා.“
