දාහත් වසරකට පෙර සුනාමි ව්‍යසනයෙන් මියගිය ශ්‍රී ලාංකිකයන් සිහිපත් කරමින් අග්‍රාමාත්‍ය මහින්ද රාජපක්ෂ මහතා 26 වන දින පෙරවරුවේ අරලියගහ මන්දිරයේ දී පහන් දැල්වීය.
අග්‍රාමාත්‍ය ආර්යා ශිරන්ති වික්‍රමසිංහ රාජපක්ෂ මහත්මිය ද අග්‍රාමාත්‍යතුමා සමඟ එක්ව පහන් දල්වමින් සුනාමියෙන් මියගිය පිරිස සිහිපත් කළාය.
පෙරවරු 9.25 සිට පෙරවරු 9.27 දක්වා යෙදුණු මිනිත්තු දෙකක නිහඬතාවයට එක්වූ අග්‍රාමාත්‍යතුමා ඇතුළු පිරිස අනතුරුව මෙසේ පහන් දල්වා මිය ගිය පිරිස සිහිපත් කළහ.
සුනාමි ව්‍යසනය ඇතුළු විවිධ ආපදාවලින් මියගිය පුද්ගලයන් සිහිපත් කෙරෙන “ජාතික සුරක්ෂිත දිනය” ද 26 ට යෙදී තිබේ.
දිස්ත්‍රික්ක 14කට බලපෑ සුනාමි ව්‍යසනයෙන් 31,229 දෙනෙකුට දිවි අහිමි වූ අතර තවත් 4100ක් දෙනා අතුරුදන් වූහ. 516,150 දෙනෙකු මෙම ව්‍යසනයෙන් අවතැන් වූ අතර 250,000ක් පමණ නිවාස හා දේපල විනාශ විය.
මෙම අවස්ථාවට අග්‍රාමාත්‍යතුමා සහ අග්‍රාමාත්‍ය ආර්යාව සමඟ යුද හමුදාව පොලිසිය ඇතුළු ආරක්ෂක අංශ සමාජිකයෝ ද එක්ව සිටියහ.
